Hausnarrean

Ez naiz sekula ohitura eta pentsamolde finkoko pertsona izan. Urteen joanean moldatu eta egokitu egin naiz, batera zein bestera, arrazoi eta gora-behara ugariren eraginez. Ziklo bat amaitu egin dela iruditzen zait. Duela bederatzi hilabete inguru euskaraz idazteari eta, are, euskarari buruz jarduteari utzi nion. Aitortzen dut kotraesana -hipokresia ere bai- nire jarreran, inori eskatzen diodana neuri buruari ez aplikatzearren. Afiliazio jeltzalea dela-eta, politika kontuetan nahastuta egon naiz buru belarri. Horrek ere bere ibilbidea agortu duelakoan nago. Nekatuta ere egin naiz gai guztiak ikuspegi jakin batetik aztertzearekin, izan euskaltzaletik, izan jeltzaletik. Eta gogaitu, ohartuz beti kakatza berean dihardugula, ez atzera ez aurrera. Mugatuegia egiten zait jokalekua. Derrigorrezkoa deritzot goragotik begiratzeari, perspektiva zabalago batetik. Ilusioa eta fedea nahitaezkoak dira edozein zereginen aurrean. Galduta modura ikusten baduzu zeure burua, hobe da gelditu eta hausnartzea.